கடலூர் மாவட்டம் குறிஞ்சிப்பாடி மீனாட்சி பேட்டையை சேர்ந்தவர் பவானி, இவர் பாட்டாளி மக்கள் கட்சியில் நகர மகளிரணி செயலாளராக பொறுப்பு வகித்து வருபவர். இவர் கணவர் முத்து, மற்றும் பெரியப்பா மகன் சத்தியமூர்த்தி, அவரது மனைவி ஐஸ்வர்யா, தம்பி ரஞ்சித், மற்றும் சத்தியமூர்த்தி, திருநங்கை யாழினி, ராகுல் ஆகிய 7 பேரும் கடந்த 24 ஆம் தேதி மாலை புதுச்சத்திரம் அருகே உள்ள பெரியகுப்பம் கடற்கரையில் பொழுதுபோக்க சென்றுள்ளனர்.
அப்போது குளித்து விட்டு வரும்போது தியாகவல்லி கிராமத்தைச் சேர்ந்த இளைஞர்கள் சிலர் அவர்களிடம் கிண்டல் அடித்தும், ஆபாசமாகவும் பேசி உள்ளனர்.
இதனை குடும்பத்தினர் தட்டிக் கேட்டபோது தியாகவல்லியை சேர்ந்த இளைஞர்களுக்கும், குடும்பத்தினருக்கும் இடையே வாக்குவாதம் ஏற்பட்டது. இதில் இளைஞர்கள் அந்த பெண்களை தாக்கிய சம்பவம் குறித்த வீடியோ காட்சிகள் சமூக வலைத்தளங்களில் வைரலாகி பரபரப்பானது.
இந்த சம்பவம் குறித்து பவானி, புதுச்சத்திரம் காவல் நிலையத்தில் புகார் அளித்தார். அதன் பேரில் போலீசார் தியாகவல்லி கிராமத்தைச் சேர்ந்த மாணிக்கவேல் (25) தினேஷ் (21), சரவணன் (24), பிரவீன்(24) ஆகிய 4 பேர் மீது பல்வேறு பிரிவுகளின் கீழ் வழக்குப் பதிவு செய்தனர்.
பின்னர் விசாரணை நடத்திய போலீசார், தியாகவல்லி கிராமத்தைச் சேர்ந்த தினேஷ், சரவணன், மாணிக்கவேல் ஆகிய 3 பேரையும் கைது செய்தனர். மேலும் தலைமறைவாக உள்ள பிரவீன் என்பவரை தேடி வருகின்றனர்.
இதுபற்றி கூறிய பாதிக்கப்பட்ட பெண் பவானி,கடற்கரையில் குளித்து விட்டு வந்தபோது இளைஞர்கள் கிண்டல் செய்தனர். எங்களுடன் வந்த குடும்பத்தினர் தட்டிக் கேட்டபோது அவர்களை அடித்தனர். பின்னர் எங்களையும் தாக்கினர். பயந்து அவர்களிடம் இருந்து தப்பித்து வேறு வழியாக சிதம்பரம் சென்று, அங்கிருந்து சொந்த ஊருக்கு சென்றோம். பெண்களுக்கு பாதுகாப்பற்ற நிலை இருப்பதாக கூறினார்.
இந்த சம்பவம் குறித்து புதுச்சத்திரம் போலீசார் தொடர்ந்து விசாரணை நடத்தி வருகின்றனர். அண்ணா பல்கலைக்கழக மாணவி பாலியல் வன்கொடுமை செய்யப்பட்ட சம்பவம் பெரும் அதிர்வலைகளை ஏற்படுத்தி உள்ள நிலையில் பெண்களுக்கு பாதுகாப்பு இல்லை என காவல் நிலையம் முன்பு பெண் பேட்டி அளித்தது பரபரப்பு ஏற்படுத்தியுள்ளது.
– முருகன்
—
