ஆம்பூர் தொகுதி வில்வநாதன் எம்எல்ஏவின் நூறுநாள் சாதனை!

பேர்னாம்பட்டு ஒன்றிய செயலாளராக இருந்தாலும், தொகுதி மறுசீரமைப்புல தன்னுடைய குடியிருப்பு ஆம்பூர் தொகுதிக்குள் வந்ததால், வில்வநாதன் 2019-2021 இடைத்தேர்தலில் திமுக எம்எல்ஏ ஆனார். ஆரம்பம் முதற்கொண்டே இராணிப்பேட்டை மாவட்ட செயலாளர் காந்தியும் சமீப காலமாக திருவண்ணாமலை எ.வ.வேலுவும் எல்லாமுமாக இருந்து வில்வநாதனை தாங்கி பிடித்திருக்கின்றனர். இடைத்தேர்தல் எம்எல்ஏ அடையாளம் கிடைத்த உடனே ஆம்பூர் தொகுதியில் உள்ள திமுக நிர்வாகிகள் ஒருவரையும் மதிப்பதில்லை. கோஷ்டிகளை உருவாக்கி காலம் தள்ளினார் மொத்த காண்ட்ராக்ட் வேலைகளையும் தானே பார்த்துக் கொண்டார். சிட்டிங் எம்எல்ஏக்களுக்கு மீண்டும் சீட் கொடுக்க முடிவு செய்ததால், திமுக பொதுச் செயலாளர் துரைமுருகன் வில்வநாதனையே பரிந்துரை செய்துவிட்டார் அதிமுக கூட்டணியில் பாஜக இருந்ததால், தொகுதியில் பெரும்பான்மையாக இருக்கும் இஸ்லாமியர், கிறித்துவர், ஆதிதிராவிடர்கள் ஓட்டுக்கள் உதயசூரியன் பக்கம் திரும்ப, எளிதாக பாஸ் பண்ணிவிட்டார் வில்வநாதன். தேர்தலில், மச்சான் சீனிவாசனையும், மகன் அசோக்குமாரையும் தவிர வேற திமுக நிர்வாகிகள் யாரையும் நம்பல, அந்த நிலை இன்றுவரை தொடருது. ஜெயித்த பிறகு, கேபிள் டிவி விவகாரம் தொடங்கி, செங்கல் சூளைக்கு மண் அள்றது, சாலையோர புளியமர டெண்டர், கோயிலுக்குனு சொல்லி பச்சகுப்பம் ஏரியாவுல மணல் அள்ளுவது என எல்லாவழியிலும் எக்ஸ்பிரஸ் வேகத்தில பணம் பார்க்கிறார். கே.என்.நேரு, எ.வ.வேலு மந்திரிகளோடு ரொம்ப நெருக்கம் காரணம் தெலுங்கு மொழி என்று கோடிட்டு காட்டுகின்றனர் ஆம்பூர் தொகுதி திமுகவினர். தொகுதிக்கென்று சட்டமன்ற அலுவலகம் கிடையாது பைபாஸ்ல ராஜுவ்காந்தி சிலை அருகில் வணிக வளாகத்தில் மேல்மாடியில் சிறிய அறையில் அலுவலகம் வைத்திருக்கிறார். கட்சியில வேண்டப்பட்டவங்க மட்டும் வர்றாங்க ஓட்டு போட்ட மக்களுக்கு விபரம் தெரியாததால் யாரும் வருவதில்லையாம். கட்சியினர் மூலம் தெரியவரும் நிகழ்ச்சிகளில் தவறாமல் கலந்து கொள்கிறார். எப்படியாவது திருப்பத்தூர் மாவட்ட செயலாளர் ஆகிடனும், ஒரு ஆறு மாதமாவது மந்திரி சீட்ல உட்கார்ந்து பார்த்திடனும் என்று அதற்கான சகல முயற்சிகளையும் செய்து கொண்டிருக்கிறார் இன்னும் பலிக்கல. நூறுநாள் சாதனை என்று ஒன்றுமில்லை, தன்னுடைய மச்சான்களின் மனைவிமார்களை உள்ளாட்சி தேர்தலில் களமிறக்கி விட்டிருக்கிறார் இதை வேண்டுமானால் சாதனையா சொல்லலாம் என்று கிண்டலடிக்கும் திமுகவினர் தொகுதியில பெரும்பான்மையான திமுகவினர் கோபத்தில் இருக்கின்றனர் வில்வநாதன் மீது இது வில்வநாதனுக்கும் தெரியும் என்கின்றனர்.